Categories
Pinoy Gazette

Bagong umaga

Pagsikat ng Araw (Sunrise)

(Unang nalathala sa Tinig.com)

Maganda ang gising ko noong umaga pagkatapos ng eleksyon. Kaisa ako ng isang buong bayang wari’y sabay-sabay na naglabas ng isang mapagpalayang buntung-hininga matapos ang di-inaasahang kinalabasan ng halalan.

Sa kabila ng napakaraming mga pangambang dulot ng kawalang-tiwala sa mga nakaupong aliw na aliw sa kapangyarihan, nairaos din ang halalan. Pagsapit ng gabi, nasaksihan ko sa telebisyon ang mabilis na pagdating ng mga resulta ng botohan. Tuwang-tuwa ako na kahit sa bilangan ng boto man lang, wari’y ang pagiging first world ay ating natikman.

Categories
Pinoy Gazette

Eleksyon 2010

Bago isagawa ang nakalipas na halalan, sari-saring pangamba ang bumalot sa isipan ng mga mamamayan. Nagduda ang marami kung matutuloy ang eleksyon. Kinabahan din ang mga tao sa posibilidad na magkaroon ng failure of elections at mangunyapit sa puwesto si Gloria Macapagal-Arroyo o kaya’y aagawin ng isang military junta ang kapangyarihan. At kung sakaling matuloy ang halalan — na nangyari naman — inasahang ito ang maging pinakamarumi — at pagkatapos ng Ampatuan Massacre — ay magiging pinakamadugo sa kasaysayan ng bansa.

Oo, naging marumi ang kampanya: di nagsawa sa batuhan ng putik ang mga kampo ng mga presidential candidates na nanguna sa survey. Hindi pa rin nawala ang bilihan ng boto. At umabot sa 32 ang namatay sa 101 election-related violence na naitala ng Armed Forces of the Philippines. Pero higit na mas mababa ang mga bilang na ito kaysa sa mga naitalang insidente ng karahasan at mga biktima sa mga nakalipas na halalan.

Categories
Pinoy Gazette Tinig.com

Ang tipo kong pangulo

Si Senador Noynoy Aquino sa Catbalogan, Samar

(Unang nalathala sa Tinig.com)

Gusto ko ng isa pang totoong People Power president.

Maluluklok siya hindi dahil sa pag-iimbot sa kapangyarihan at panlilinlang sa masang tumatayo para sa katotohanan at katarungan. Uupo siya nang walang mga kakuntsabang nangungumisyon at tutulong na makalamang siya ng mahigit isang milyon.

Iluluklok siya ng lakas ng bayan sa pamamagitan ng bayanihan. Kusang-loob siyang susuportahan ng mga mamamayan di dahil sa makukuhang pansariling pakinabang, kundi dahil sa paniniwala sa kanyang kabutihang loob at katapatan. Iboboto siya dahil naghahatid siya ng pag-asang muling sisikat ang araw, ang bansa’y babangon, at ang bagong Pilipinas ay ating masisilayan. Magiging inspirasyon siyang magbabalik ng tiwala nating mga Pilipino sa ating sarili.

Categories
Pinoy Gazette

Si Manny Villar…

Manny Pacquiao, Manny Villar, at Loren Legarda
Si Senador Manny Villar kasama sina Manny Pacquiao at Senador Loren Legarda.
Kapag tinanong ninyo ang mga kamag-anak ninyo rito sa Pilipinas kung nakaligo na ba sila sa bundok ng basura o nag-Pasko na ba sila sa gitna ng kalsada, malamang ay sasagot sila ng “‘Yan ang tanong namin: Tunay ka bang isa sa amin?” Kung hindi nila alam ang mga linyang ‘yan, ang payo ko’y padalhan n’yo sila ng bagong radyo o telebisyon.

Galing ‘yan sa campaign jingle ni Senador Manny Villar, kandidato sa pagkapangulo ng Pilipinas sa halalan ngayong Mayo. Sa mga nakalipas na buwan, maya’t maya’y naririnig sa radyo at napapanood sa TV ang political ad niyang iyan na nagtatampok sa mga batang kumakanta.

Categories
Pinoy Gazette

Bagyo at kampanya

Hindi pa tuluyang nakakabangon ang bansa sa hagupit ng magkasunod na bagyong Ondoy at Pepeng, ngunit sadya yatang di na mapipigilan ang pagdating ng unofficial campaign season. Unofficial, sapagkat sa isang taon pa dapat ito magsisimula, pero parang ganito na rin ang ginagawa ng mga kakandidato.

May kumalat sa Internet na larawan ng lalagyan ng pagkain na may naka-tape na label na “Tulong mula kay Manny Villar” at ng kanyang signature mark na check. May isa pang kumalat na litrato ng instant noodles na may sticker naman ng kanyang mukha at pangalan. Siyempre, hindi pa natin sigurado kung galing nga kina Villar ang mga relief goods na may pangalan ng pambato ng Nacionalista Party. Pero aktibo si Villar, kasama ang Wowowee host na si Willie Revillame, sa relief operations. May nalathala pa nga sa diyaryo na larawan niya habang namimigay ng relief goods.